Sirach (Ecclesiasticus) 5

5:1

Noli attendere ad possessiones iniquas, et ne dixeris : Est mihi sufficiens vita : nihil enim proderit in tempore vindictæ et obductionis.

—

5:2

Ne sequaris in fortitudine tua concupiscentiam cordis tui,

—

5:3

et ne dixeris : Quomodo potui ? aut, Quis me subjiciet propter facta mea ? Deus enim vindicans vindicabit.

—

5:4

Ne dixeris : Peccavi : et quid mihi accidit triste ? Altissimus enim est patiens redditor.

—

5:5

De propitiatio peccato noli esse sine metu, neque adjicias peccatum super peccatum.

—

5:6

Et ne dicas : Miseratio Domini magna est, multitudinis peccatorum meorum miserebitur :

—

5:7

misericordia enim et ira ab illo cito proximant, et in peccatores respicit ira illius.

—

5:8

Non tardes converti ad Dominum, et ne differas de die in diem :

—

5:9

subito enim veniet ira illius, et in tempore vindictæ disperdet te.

—